O 23 e 24 de febreiro visitamos os institutos de ensinanza secundaria de Betanzos coa xincana literaria 'Rosalía na voz da xente', unha proposta escénica interactiva que procura achegar dunha maneira participativa e lúdica a obra e figura de Rosalía de Castro.

A través dunha posta en escena teatral e con formato de xincana, as educadoras propóñenlle ás mozas e mozos participantes unha serie de retos a superar, relacionadas coa vida e figura da homenaxeada combinando o compoñente históricoliterario coa dimensión lúdica e motivadora. Cada educador/a debidamente caracterizado/a expón algúns trazos sinalados da actividade da poeta, das súas ideas ou do contexto da época e propón un pequeno xogo.
As nosas intervencións baséanse nunha metodoloxía participativa, activa e flexible. Procuramos que a persoa se poida sentir en todo momento protagonista da acción, pois así se favorece unha aprendizaxe significativa. Somos partidarios/as de utilizar o xogo e as actividades lúdicas como conduto para o coñecemento, pois deste xeito se promove unha mellor disposición, motivación e ánimo cara os contidos que desexamos promover. Acádase ademais unha acción de desfrute válida en si mesma, pois a fin propia do xogo é xogar e desfrutar facéndoo.
A xente quere ser sorpendida e non aborrecida, máxime en materias relacionadas coa cultura, tantas veces asociada a actividades soporíferas. Sen perder por isto nin un ápice de rigor, entendemos que cómpre saber ser didácticos/as tanto na selección como na presentación dos temas e contidos.

Para ver algunhas fotos da actividade clica aquí