O galego campa! é un programa de dinamización lingüística da Secretaría Xeral de Política Lingüística e da Dirección Xeral de Xuventude e Voluntariado destinado aos campamentos de verán. O obxectivo deste programa é favorecer o desenvolvemento da actividade en galego no contexto dos campamentos de verán da Xunta de Galicia e mais facilitarlle formación e recursos ao monitorado para a realización de actividades que animen os rapaces e rapazas a se expresaren nesta lingua.

Nesta cuarta edición do programa O galego campa!, participantes na quenda de agosto dos campamentos de verán da Xunta que se desenvolven no marco do programa Acción de Verán 2014  terán ocasión de participar na nosa xincana lingüística Lingua Forza 3!, un proxecto de dinamización lingüística que consiste na recuperación de xogos populares, a disposición de xogos novos e diferentes, e xogos lingüísticos que procuran fomentar o uso do galego dun xeito eminentemente lúdico

A través do xogo e con formato de gran feirón, Lingua Forza 3! propón unha serie de probas que os rapaces e rapazas terán que ir superando de maneira cooperativa. Deste xeito, aprenderán galego e verán fortalecida a valoración do noso patrimonio lingüístico sen abandonar o contexto lúdico e deportivo do campamento.

Consulta as datas e lugares de realización aquí.