Subvencionado polo programa europeo Erasmus Plus.
Durante sete días, unha trintena de mozas e mozas de entre 14 e 18 anos e educadoras de Xandobela, La corte della Carta (Italia) e Associação Para o Desenvolvimento de Pitões (Portugal), xuntámonos en Mantova para pór en práctica actividades e metodoloxías no eido da intervención cultural co colectivo adolescente con mirada feminista.
O intercambio xuvenil "Buscando musas" é unha continuidade do traballo que desde o mes de xaneiro do 2021 vimos coordinando a canda as organizacións parceiras do proxecto "Muses" nos respectivos contextos locais.
Trátase dun proxecto no que se están a experimentar con múltiples técnicas, ferramentas e métodos para o descubrimento, análise e difusión da cultura e das artes con perspectiva de xénero. A nivel local estase a traballar con cadanseu grupo de adolescentes na busca e identificación de referentes culturais e artísticas con mirada feminista (ou Muses); estánselles a realizar entrevistas nas que se documentan as súas vivencias e opinións arredor dos estereotipos e barreiras por razón de xénero: unha labor de formación, investigación e creación audiovisual totalmente autoxerida polas propias mozas e mozos, e que dará como resultado unha galería de entrevistas nas que se amosará a experiencia dun total de 15 Muses da Galiza, Portugal e Italia, para o seu uso e aproveitamento na educación formal e na educación non formal.
O proceso de investigación-acción culminará coa publicación dunha guía metodolóxica para educadoras/es cuxo obxectivo é dotar de recursos, ideas e métodos transferibles a calquera contexto socioeducativo ou sociocultural.
Máis info: https://museserasmusplus.weebly.com/